2018-12-02 ~ Кугламе и сме среќни

Тамара Талевска, најдобра во битолскиот спринт, девојките доминантни на битолската куглана

Саботата (08 декември) беше резервирана за турнирот на Битола во спринт до 14 години

По пат на ждреб, стигнавме до 1/16 а потоа со елиминација стигнавме до победникот. За прв пат немаше машка и женска конкуренција туку сите рамноправно настапуваа. Се куглаше на 2х10+5, по истите правила како на меѓународните турнири, но со скратени 5 кугли на чистење.

На тешката куглана во Битола, очекувавме дека машките ќе доминираат, НО, денес беше ден на девојките.

Полека, но сигурно машките беа елиминирани во 1/16, во 1/8, за во 1/4 финале да отпаднат и фаворитите Коста, Архан и Стефан Т. За овие брилијантни повбеди најзаслужни беа Емилија П, Ружица и Данче.

Во 1/2 финалето се сретнаа 4 девојки, горенаведените и Тамара кој пак во 1/4 финалето ја совлада Јована Г, градски првак за 2018.

Во првото полуфинале се сретнаа Ружица против Емилија и Данче против Тамара.

Во самата завршница преовладуваа емоциите, па воопшто не беше лесно да се кугла под притисокот од медалите.

Ружица водеше со 1:0 во сетови, а Емилија иако имаше предност во вториот сет, иако со 14-тата кугла успеа да ја исчисти поставата, неочекувано и покрај одличната игра во текот на целиот натпреварувачки ден, 15-тата кугла во полни ја одигра 0. На Ружица и требаше само 4 за победа. Или 3 за пенал на патека, но не, иако куглата одеше во центар неочекувано скршна од својата патека и имаше само 2. Натпреварот беше решен на пенали (со 3 кугли во полни), а Емилија беше подобра

Во второто полуфинале Данче видно возбудена од успехот играше деконцентрирана и загуби од Тамара со 2:0.

Во финалето Емилија беше блиску но не успеа да и земе сет на Тамара и со 2:0, девојчето кое игра бавна, но исклучително прецизна кугла, беше победник. Браво Тамара!!!

На 07 декември (петок) во битолската куглана беше струмичанката Мери Јанева, репрезентативка на Р.Македонија, државен кадетски, јуниорски и сениорски првак и носител на 2 бронза од големите натпреварувања.

Директно од Струмица, напуштајќи го своето работно место порано за да стигне навреме на нашиот тренинг, без одмор од патот влезе во кугланата и го започна својот тренинг со нашите млади куглари.

Прилично беше емотивна дека токму и таа произлегла од сличен проект во Скопје, со тоа што нејзиниот говор кон присутните беше мотивирачки и во насока на жртвата која треба да се принесе за куглањето но и сите придобивки од овој прекрасен спорт.

Нашите куглари со задоволство соработуваа со оваа прекрасна и добра личност од кугларскиот свет, а Мери несебично даваше совети и коментари како нашите куглари да ја подобрат својата игра. Патем, Мери е ученик на две големи кугларски легенди од Македонија (Тодор Манев и Менсур Ајдин)

Во нејзината изјава непосредно не потсети дека иако куглала во оваа куглана на официјални натпревари не сака да кугла веќе во истата и дека овие деца 2019 година заслужуваат да куглаат на модерна куглана.

Мери, благодариме за твојот ангажман!

Двете наши гостинки, репрезентативки кои внимателно ги набљудуваа нашите куглари од проектот „Кугламе и сме среќни“ како куглаат во Мусандра и кои дадоа свој придонес со сите нивни коментари и совети. Фала ви девојки ...

Денес, недела, 02.12.2018, кугларите од проектот „Кугламе и сме среќни“ за прв пат имаа прилика да куглаат на куглана на плочи. И нормално, каде ако не во храмот на македонското куглање, кугланата која е прва голема куглана ,1974, автоматизирана каде што неколку пати се одигрувале големи европски и светски првенства, кугларницата Мусандра во ГТЦ, Скопје.

Очекувано, wow ефект при влегувањето и трема од новиот амбиент од страна на нашите кугларчиња. Љубезно пречекани од домаќините, од вработените и кугларите од ГТЦ, предводени од нивниот играч Слободан Лазарков.

Не пречекаа исто така и кугларската легенда на македонското куглање Менсур Ајдин (репрезентативец, селектор на репрезентација, човек кој сиот свој живот го посветил на куглањето и сеуште одлично се држи и е активен куглар), Перо Гиевски (човек кој го води генерално женскиот клуб), Дарко Димитровски (член на новиот ИО на КФМ, инаку коосновач на к.к. Вардар2014) и Билјана (Биба) Гавриловска, репрезентативка кои ги поздравија нашите куглари пред почетокот на тренингот, пренесоа пораки, искуства и ни посакаа убави мигови во кугланата. Сите внимателно ги следеа нашите куглари, како куглаат и споделуваа мислења со нашите тренери од проектот.

Куглавме во еден невообичаен формат 2х30 од кои 50 во полни и 10 во чистење. Чистењето е нешто ново за нашите куглари и само неколку тренинзи го имаме работено и не сакавме да ги оптовариме со таа игра бидејќи сеуште дел од нив не се подготвени за тоа.

Резултатите, како за прв пат на ваков тип на куглана, повеќе од одлични. Во женска категорија најдобра беше Емилија Переска со 267, Јована Спасеновска 263, Андреа Вељановска со 257, Стефанија Алексовска 255, Ана Марија Вељановска 254, Ружица Ѓорѓиевска и Невена Гилева 252, Јована Гроздевска 251 и Наталија Чона 250. Останатите резултати беа под 250.

Во машка категорија, најдобар беше Дарко Стојковски 288, Павел Гагачев 268, Ајхан Арслановски 265, Васко Стојановски 263, Кико Димовски 260, Горан Христовски 251. Останатите резултати беа под 250.

Генерално како тренери сме задоволни од прикажаната игра, беа направени и многу грешки што е раазбирливо, бунеа сензорите за престап (што ги немаме во Битола), бунеше времето(немаме тајмери), самата просторност на кугланата, подлогата, однесувањето на даските, мазноста на куглите ... но како за прв пат беше одлично.

Ние куглавме и бевме среќни, а овој ден ќе се забележи како едно убаво искуство и покажување на битолските куглари што значи да се има куглана која е стандард во цела Европа. Задоволството да се кугла на овие 13-14 годишни деца беше евидентно и со полн жар искуглаа борејќи се за што подобра игра.

Повеќе фотогррафии од денешниот настан: